Новости од клиниката
Панел-дискусија посветена на меланомот
Месец мај традиционално се одбележува како месец посветен на подигнување на свеста за меланомот – малигно заболување кое, поради својата агресивност и потенцијал за брза прогресија, претставува значаен предизвик во современата онколошка пракса. Превенцијата, раната детекција и навременото започнување на соодветен терапевтски третман имаат суштинско значење за подобрување на прогнозата и здравствените исходи кај пациентите.
По повод одбележувањето на овој месец, беше реализирана панел-дискусија посветена на меланомот, на која активно учество зедоа директорот на Фондот за здравствено осигурување на Македонија, заменик-министерот за здравство, како и директорот на ЈЗУ Универзитетска клиника за радиотерапија и онкологија.
На настанот учествуваа и лекари онколози, патолози, дерматолози и пластични хирурзи, со што беше нагласена важноста на мултидисциплинарниот пристап во превенцијата, дијагностиката, третманот и следењето на пациентите со меланом.
Нивното учество претставува значаен придонес кон афирмирање на потребата од системски пристап во превенцијата, раната дијагностика, современиот третман и унапредувањето на институционалната координација во справувањето со меланомот како важно јавно-здравствено прашање.
Организатор на настанот беше здружението ХЕМА-ОНКО, кое преку вакви иницијативи континуирано придонесува кон промоција на здравствената писменост, поддршка на пациентите и поттикнување на стручна и општествена дискусија за теми од особено значење во областа на онкологијата.
Подигнувањето на свеста за меланомот бара интегриран и интердисциплинарен пристап, со активна соработка меѓу здравствените институции, креаторите на здравствени политики, граѓанскиот сектор, стручната јавност и пошироката јавност. Само преку заедничко делување може да се унапредат превентивните стратегии, да се поттикне раното препознавање на болеста и да се обезбеди поквалитетна и подостапна здравствена заштита за пациентите.